Í dag verður Einar Waag, bryggjari og vinnulívsmaður, 75 ár.

Føroya Bjór er lívsverkið hjá Einari. Í meira enn 50 ár hevur hann stýrt søguríku familjufyritøkuni, ið nú er eitt av elstu bryggjaríum í norðanlondum.

Við hegni og treiskni hevur stjórin stútt og støðugt megnað at tillaga fyritøkuna til hørðu og umskiftandi kappingartreytirnar. Og broytingarnar hava verið stórar hesi árini. Frá veikum til sterkari øl. Blikkini, serølirnar og sterkari løgurin. Tað ræður um við jøvnum millumbili at rætta kós og bróta upp úr nýggjum fyri at standa seg. Og tað ger hann framvegis, slóðar fyri og gongur ótroyttar leiðir, hóast hann er farin væl um pensjónsaldur. Gyltu whiskeydroparnir, sum renna úr tunnunum í dagførda og framkomna framleiðsluvirkinum eru seinasta nýbrotið í rúgvuni. Framvegis verður eisini hugsað um umhvørvið í menningini av framleiðsluni á Føroya Bjór, ið eisini slóðar fyri á hesum økinum.

Einar er vinnulívsmaður, men fram um alt forvitin fakmaður. Yrkisliga útsýnið fevnir víða, hann kennir rákið í tíðini, og evnini at hugsa øðrvísi hava altíð verið góð. Útbúgvingina sum bryggjari tók hann í týska stórbýnum München í 1968.

Føddur 1. februar 1947 í Klaksvík. Einar er sonur Annelenu og Einar Frovin Waag. Barndómshúsið stendur framvegis á Fornagørðum, bara lítlan metur frá lokala familjubryggjarínum, sum bæði abbin og pápin eisini hava átt og rikið. Lívsleiðin hjá Einari var eisini tíðliga fyriskipað. Føroya Bjór kom inn við blóðinum, hann fekk tíðliga áhuga fyri fakinum, og sum hann onkuntíð hevur sagt, so hevði hann neyvan nakað annað val, tí heima við hús var ikki roknað við øðrum enn, at Einar skuldi lyfta familjuarvin. Í 1970 tók hann við stóru ábyrgdini sum stjóri, bara 23 ára gamal.

Føroya Bjór taldist longu tá millum elstu fyritøkurnar í landinum. Abbi Einar, fjøltáttaði hugsjónar og vinnulívsmaðurin Símun í Vági var í 1888 giftur við Karin Helena úr Funningsstovu í Havn, sama árið sum hann legði lunnar undir at bryggja føroyskt øl í kjallaranum í heiminum norðuri í Vági. Símun í Vági var við til at stovna Føroya Fólkaháskúla í 1899. Hann lat eisini tekna eyðkenda búmerkið av veðrinum, sum hevur verið ímyndin av bryggjarínum øll árini.

Sonurin Einar Frovin Waag (1894-1989) tók við eftir pápan og fór undir trongum umstøðum undir sodavatnsframleiðslu í 1935. Hann bygdi eisini nýtt bryggjarí nærhendis gamla bryggjaríið á Fornagørðum, har stórur eftirspurningur serliga var eftir tiltikna pilsnarinum og appelsinsodavatninum, og hann fekk eisini rættindini at framleiða Jolly Cola í Føroyum.

Seinastu 52 árini hevur nú 75 ára gamli Einar Waag við treiskum vilja og stórum tøkum fingið tað at borið til. Tað hava verið spennandi tíðir. Í 1980 bar aftur til at bryggja sterkari øl í Føroyum, og arbeiðið fór tá at ganga við fullari ferð. Við góðum treysti víðkaðu Einar og starvsfólkið á Føroya Bjór munandi um sína framleiðslu. Tað var eisini tá, at umhildna Veðraølin kom á marknaðin. Góða og fjølbroytta úrvalið av føroyskari framleiðslu hevur eisini vunnið fyritøkuni viðurkenning og bestu viðmæli, bæði í Føroyum og úti í heimi.

Í 2011 var loyvi at bryggja sterkari enn 5,8 prosent. Tað víðkaði enn meira um møguleikarnar at virka. Við Einar’s Distillery fór Einar eldhugaður undir framleiðslu av serføroyskum akvavitti, vodka, bitter, gin og whisky. Og fakið dugir hann til lítar. So seint sum í oktober í fjør fekk fimta whiskyfløskan frá Einar’s Distillery bestu skotsmál frá Jim Murray í viðurkendu The Whisky Bible.

Einar hevur eisini verið við at ávirka og mynda tær rembingar, sum hava verið á marknaðinum.

Avbjóðingar hava sanniliga eisini verið á vegnum, serliga í soltnum tíðum, tá samfelagsmotorarnir hava verið noyddir at slakka av. Í teimum førum hevur rátt um at stýra hegnisliga og hava dirvið at taka neyðugar avgerðir. Einar hevur góða barlast, hann missir ikki fótafestið av tíðarandanum, og Føroya Bjór kom eisini væl burturúr sváru samfelagskreppuni í nítiárunum, tá stígur kom í búskapin og ein stórur partur av fólkinum misti arbeiði og flutti av landinum. Seinni rakti eisini altjóða fíggjarkreppan.

Einar er kanska fáorðaður, men tá ið tað verður seg smakk og góðsku á rávørum hugsar hann stórt. Hann hevur fylgt grundjónarmiðnum hjá abba sínum, at nýta allarbestu rávørur og tilfar í framleiðsluni. Hettar sæst eisini aftur í úrslitinum og skotsmálunum, ið Føroya Bjór hevur fingið.

Einar er stillførur maður, hann veiggjar ikki við ørmunum, har hann ferðast, men Føroya Bjór hevur hinvegin verið virkin og sjónligur samfelagsviðspælari øll árini. Fyritøkan stuðlar støðugt góðum átøkum, tað verið seg samfelagsligum, vinnuligum, umhvørvisligum ella ítróttaligum átøkum.

Einar plagar brosandi at siga, at hann trappaði niður fyri nøkrum árum síðan. Hann fer nú til arbeiðis klokkan hálvgum níggju, og ikki klokkan átta, sum hann plagdi. Arbeiðshugurin er kortini tann sami, sum hann altíð hevur verið. Føroya Bjór hevur seinastu ár framt stórar í íløgur í framtíðina, í framkomin framleiðsluhøli og framleiðslutól. Og tað er ríkiligt at takast við, tí menningin gongur skjótt í dag og tað er nokk at fáast við.

Í dag starvast 40 fólk á teimum fimm deildunum kring landið, í Havn, Klaksvík, Leirvík, Hoyvík og á Tvøroyri.

Einar hevur eisini nógv frítíðarítrív.  Náttúran hevur altíð havt hansara stóra tokka. Tað verður seg plantir, urtir, fuglar og seyð. Serliga fer nógv tíð við at røkja seyðin á festinum,  ið hann keypti aftur í familjuna fyri nøkrum árum síðani.

Einar er giftur Elisu Waag, og tey eiga dóttrina Anniku, sum er fjórða ættarlið á Føroya Bjór. Annika er matvørukandidat og bryggjari og arbeiðir sum virkisleiðari á Føroya Bjór. Abbabørnini eru trý, Elisa, Einar og Marjun.

Hjartaliga til lukku við degnum.

Starvsfelagarnir

Nordic Hard Seltzer

Nordic Hard Seltzer. Eitt frískligt og brúsandi íkast til summarið. Hetta er tann fyrsti av sínum slag, sum er framleiddur í Føroyum.

Nordic Hard Seltzer inniheldur bert fáar kaloriur. Smakkurin er fruktkendur, úr nátúrligum úrdráttum, uttan gluten, og einki sukur. Smakkirnir eru lættir og brúsandi við Passion Fruit/Mango og Elderflower/Lime.

Seinastu árini hevur Hard Seltzer verið sera væl umtókt uttanlands, og tí meta vit eisini, at tíðin er búgvin til at hettar verður framleitt í Føroyum.

Vit vóna at tit taka væl ímóti Nordic Hard Seltzer, sum í fyrstu syftu fæst til keyps í sølubúðunum hjá Føroya Bjór og hjá Rúsdrekkasøluni.

 

Innihald: 33 cl, 4.5% vol,

Smakkur: Lætt og brúsandi

Orkuinnihald: 25 Kcal/100 ml

Onki sukur

Uttan gluten

30 ár síðan Landskrona

12. september 1990 vann føroyska A-landsliðið hjá monnum sín fyrsta EM-undankappingardyst, tá Torkil Nielsen knallaði bóltin í málið til endaliga úrslitið 1-0 til Føroyar. Hesin sigurin stendur fastur í minninum hjá flestu føroyingum sum ein av mongu minningarríku løtunum í altjóða ítrótti.

Føroya Bjór hátíðarheldur 30 ára dagin við at bryggja eina Landskrona.er ein export øl 5.8 % bryggjað nakað á sama hátt sum gulløl, men við væl meira av aromahumlu, citrus og frugtanga.

Fæst til keyps í Rúsuni í Tórshavn og sølubúðunum hjá Føroya Bjór í Tórshavn, Hoyvík og Klaksvík.

Einar´s Distillery hevur vunnið heiðursmerki

Vit eru errin av at kunna boða frá, at hevur fingið viðurkenning á London Spirits Competition 2020, og er heiðrað við gullmedalju fyri síni 92 stig í kappingini. Dómararnir eru serfrøðingar innan sína vinnugrein og hava blindsmakka, mett um fjølbroytni og slag og hava smakkað umaftur. Mett verður eftir góðsku, virði fyri pengarnar og hvussu fløskan umboðar innihaldið. Øllum hesum eru vit errin av.

 

Einar’s Bitter ein serstøk bitter við føroyskum vatni og kryddað við útvaldum urtum m.a. fleiri føroyskum.

40 ár síðani Gull og Veðrur komu á marknaðin

 

 

 

Summarið 1980 var ein spennandi tíð hjá føroyskari ølbrygging og bryggjaríunum, ið tá vóru, Føroya Bjór og Restorffs. Hetta summarið var uppskotið um loyvi at bryggja øl sterkari enn 2,7% samtykt í landsstýrinum.

 

Vilhelm Johannesen, ið tá var landsstýrismaður í lógar- og vinnumálum, legði uppskotið fyri Løgtingið um at loyva bryggjaríunum at bryggja sterkari øl. Vilhelm vísti á, at eftir uppskotinum svaraði framleiðslugjaldið á føroyskt framleiddum øli til umleið innflutningstollin og 13 prosent av serliga innflutningsgjaldinum. Landskassin fekk sostatt umleið somu inntøku av øli bryggjað í Føroyum sum av innfluttum øli.

 

Føroya Bjór var væl fyrireikað at bryggja sterkari øl enn tað, ið framman undan var loyvt. Við stórum tangakapasiteti og møguleika at bryggja upp til 10.000 litrar av øli um dagin vóru umstøðurnar hjá Føroya Bjór góðar. 17. mai 1980 boðaði Vilhelm Johannesen frá, at bryggjaríini høvdu møguleika at søkja um fyribilsloyvi at bryggja sterkari øl. Treytin var at einki øl varð útflýggjað, fyrr enn endaliga loyvið var staðfest. Óli Breckmann, løgtingsmaður, helt fyri, at Vilhelm skeyt papageykin, men rakti elefantin, tí Løgtingið samtykti, at alkoholprosentið mátti ikki fara upp um 5,8 prosent, og tískil var ikki longur loyvt at selja danskan elefant her á landi.

 

Mikudagin 16. juli 1980 upplýsti Vilhelm Johannesen, at loyvini at tappa og selja øl vóru send til Klaksvíkar, og klárt var at selja, so skjótt tollvaldið hevði góðkent goymslurnar hjá Føroya Bjór, ið hevði bryggjað 5.000 kassar av øli, 2700 av hesum vóru Gull. Fríggjadagin 18. juli fóru fyrstu kassarnir úr sølubúðini í Klaksvík, og mánadagin 21. juli úr sølubúðini í Havn. Alt Gullølið varð útselt longu fyrstu vikuna. Tá kostaði ein kassi av Gulli 180 kr. og ein kassi av Veðri 132 kr.

 

Føroya Bjór hátíðarheldur dagin við størri íløtum til bæði Veðr og Gull, so møguleiki nú eisini er at keypa 0,5 litur. Smakkurin er tann sami. Veðrapilsnarin hevur sín fríska og fruktkenda anga við løttum malt- og humlusmakki, meðan Gullølin, aromatisk og frísklig, m.a. er frálík afturvið røstum og væl kryddaðum mati, ikki minst øllum tí, føroyingar borðreiða við til veitslur, stevnur og aðrar merkisdagar.

Nýggj øl frá Føroya Bjór – Múlafossur Red Ale

 

Nýggj øl frá Føroya Bjór – Múlafossur Red Ale

í samstarvi við bóndan í Gásadali, Jóhan Fagraklett hava vit bryggjað eina nýggja øl. Hetta er ein Irish Red Ale við vatni úr Múlafossi og byggið er somuleiðis úr Gásadali.

Ein Reyðlig bjór við góðum og mjúkum ráka av ymiskum maltsløgum og bayerskari humlu, ið hóskar væl til lambs- og neytakjøt.

 

Frá hugskoti til veruleika
í gomlum døgum var jørðin í Gásadali brúkt til at dyrka korn á. Hetta kann lesast í gomlum skjølum. Tí kom hugskotið at royna hetta aftur.

Í februar 2019 hittust bóndin í Gásadali og Einar Waag á landbúnaðarstevnu í Klaksvík. Kornið skuldi fyrst og fremst brúkast sum fóður, men Einar helt fyri, at tað var synd at brúka alt til matna.

– Heldur áttu vit at roynt at bryggja eina øl við føroyskum byggi og ikki minst vatni úr Gásadali.

Tá akurin var hálvan metur høgur var klárt at hesta. Kornið varð fingið til vega og turkað á garðinum. Síðani varð kornið koyrt til Klaksvíkar, har ølin er bryggjað. Úrslitið er sum áður nevnt ein Irish Red Ale, ið kallast Múlafossur. Ølin fæst í 33 cl fløskum og verður at fáa í sølubúðunum hjá Føroya Bjór í morgin, 5. mai.

Jólasnapsur frá Einar´s Distillery

Einar´s Distillery er í jólahýri. Í langa tíð, hevur jólasnapsurin lagrað á hesum brimbardu klettum á Bourbon føtum.

Hettar er Føroysk framleiðsla, ið er kryddað við vistfrøðiligum jólakryddi og føroyskum urtum, siga tey á Einar´s Distillery.

Jólasnapsurin er 38 % vol, smakkurin er kraftigur og serstakliga Jólaligur.

Jólasnapsurin hóskar væl  til hugnaligar jólaløtur, sum ein vælkomsdrykkur ella omaná ein góðan jóladøgurða.

 

Talan er um eina avmarkaða nøgd.

 

Jólabryggið 2019

 

Jólabryggið 2019 frá Føroya Bjór er bryggjað og fæst til keyps  fríggjadagin 1. november.

Bryggjarar frá Føroya Bjór siga,  at nógv er gjørt burtur úr góðsku og samanseting av rávørum til ársins jólabryggj.

Sera góð skotsmál eru longu givin frá serfrøðingum heima og uttanlanda, ið hava smakkað Jólabryggið.

Jólabryggið hóskar serliga væl afturvið øllum jólamati sum røstum kjøti, gás, fleska- og oksasteik.

Jólabryggj fæst til keypst í sølubúðunum kring landið.

Ólavsøkubryggið 2019

Til tjóðarhátíðina hevur Føroya Bjór bryggjað eitt serstakt ólavsøkubryggj prýtt við eyðkendum føroyskum litum.

Annika Waag, góðsku- og framleiðsluleiðari á Føroya Bjór, sigur:

“Ólavsøkubryggið er ein serstøk samanseting av malti, humlu og føroyskum urtum. Ólavsøkubryggj hóskar serstakliga væl til føroyskan mat og til ólavsøkuborðið og vit vóna, at føroyingum fer at dáma væl nýggja bryggið.”

Avmarkað nøgd.

Nýggj summar Sisu frá Føroya Bjór

 

Sisu Exotic er ein frísk og leskilig  summar Sisu, ið gevur eina góða uppliving av sól og summar.

Sisu Exotic fæst sum 1,5 L. og Sisu Exotic  0,5 L. fæst um  2-3 vikur.

Gott summar.